Navoiyni yod etib – buyuk shoirning 585 yilligi nishonlandi
Pedagogika va psixologiya fakultetida buyuk mutafakkir, so‘z mulkining sultoni Alisher Navoiy tavalludining 585 yilligi munosabati bilan “Navoiyni yod etib” nomli ma’naviy-ma’rifiy tadbir tashkil etildi. Mazkur tadbir milliy adabiyotimizning bebaho durdonalarini keng targ‘ib etish, yoshlar qalbida badiiy tafakkur, yuksak ma’naviyat va milliy o‘zlikni anglash tuyg‘ularini mustahkamlashga qaratildi.
Tadbirda fakultet rahbariyati, professor-o‘qituvchilar, adabiyotshunos olimlar hamda talaba-yoshlar faol ishtirok etdi. Tadbirni ochib bergan so‘zlarda Alisher Navoiy ijodining o‘zbek adabiyoti taraqqiyotidagi beqiyos o‘rni, uning asarlari orqali insonparvarlik, ezgulik, vatanparvarlik va komillik g‘oyalari targ‘ib etilishi alohida ta’kidlandi.
Dastur davomida talabalar tomonidan Alisher Navoiyning g‘azallari va ruboiylari ifodali o‘qildi, shoir ijodiga bag‘ishlangan sahna ko‘rinishlari namoyish etildi. Ayniqsa, “Xamsa” dostonlari asosida sahnalashtirilgan lavhalar tomoshabinlarda katta taassurot qoldirdi. Mumtoz kuy-qo‘shiqlar va musiqiy chiqishlar tadbirga yanada ko‘tarinki ruh bag‘ishladi.
Shuningdek, tadbir davomida so‘zga chiqqan professor-o‘qituvchilar Alisher Navoiy asarlarining bugungi kun yoshlari tarbiyasidagi ahamiyati, uning ijodi orqali axloqiy poklik, ilmga intilish va ma’naviy kamolotga erishish g‘oyalari singdirilishini alohida e’tirof etdilar. Talaba-yoshlar ham buyuk shoir ijodiga bo‘lgan qiziqishlari va taassurotlari bilan o‘rtoqlashdilar.
Bayramona va samimiy ruhda o‘tgan ushbu ma’naviy-ma’rifiy tadbir yoshlar qalbida buyuk ajdodlarimiz merosiga bo‘lgan hurmat va ehtiromni yanada mustahkamlab, adabiyotga bo‘lgan muhabbatni kuchaytirdi.
Pedagogika va psixologiya fakultetida tashkil etilgan mazkur tadbir Alisher Navoiy siymosini ulug‘lash, uning bebaho adabiy merosini keng targ‘ib etish hamda uni kelajak avlodga yetkazish yo‘lidagi muhim va ezgu qadamlardan biri bo‘ldi.
