Madaniy-ma'rifiy faoliyat

Qoʻqon davlat universitetida talaba-yoshlar o‘rtasida milliylikni targ‘ib qilish, ularni milliy merosimiz, qadimiy urf-odatlarimiz bilan yaqindan tanishtirish hamda yoshlarda harbiy-vatanparvarlik ruhini oshirish maqsadida “Eng yaxshi videorolik” tanlovi tashkil etildi. Tanlov davomida talabalar o‘z ijodiy yondashuvi, milliy ruh va estetikani uyg‘unlashtirgan holda turli mavzularda videoroliklar tayyorlab, o‘z bilim va iste’dodlarini namoyish etdilar. Baholash jarayonida ishtirokchilarning ijodiy yondashuvi, videorolikning mazmuni, ifoda uslubi va texnik sifati inobatga olindi. Tanlov g‘oliblari: 1-o‘rin — Karimjonov Karimjon, Filologiya fakulteti talabasi 2-o‘rin — Abdurahimova Dilnoza, San’atshunoslik va sport fakulteti talabasi 3-o‘rin — Zaylobiddinova Havasxon, Filologiya fakulteti talabasi G‘oliblar diplom va esdalik sovg‘alari bilan taqdirlandi.

Toshkent shahridagi Oʻzbekiston yengil atletika federatsiyasi stadionida yengil atletika boʻyicha kattalar va 20 yoshgacha boʻlgan sportchilar oʻrtasida mamlakat chempionati boʻlib oʻtdi. Musobaqaning disk uloqtirish yoʻnalishida Qoʻqon davlat universitetining Jismoniy madaniyat yoʻnalishi talabasi Muhammadali Sodiqov U20 toifasida faxrli 1-oʻrinni egallab, oltin medal sohibiga aylandi. Bu gʻalaba — mehnat, iroda va fidoyilik samarasidir! Qoʻqon DU seni qoʻllaydi, Muhammadali!

2025-yil 21–26 aprel kunlari Jizzax shahridagi “Kiber arena” sport majmuasida qilichbozlik sporti boʻyicha 23 yoshgacha boʻlgan sportchilar oʻrtasida Oʻzbekiston chempionati boʻlib oʻtdi. Mazkur musobaqaning rapira yoʻnalishi boʻyicha jamoaviy bahslarida ishtirok etgan Qoʻqon davlat universiteti Jismoniy madaniyat yoʻnalishi talabasi Maftuna Davronova "Fargʻona-1" jamoasi tarkibida munosib ishtirok etdi va chempionatda faxrli 1-oʻrinini egallab, oltin medalga sazovor boʻldi. Qoʻqon davlat universiteti jamoasi Maftuna Davronovani ushbu yutuq bilan tabriklaydi va kelgusidagi musobaqalarda ham ulkan zafarlar tilaydi.

Bugun Qoʻqon davlat universiteti Sport klubida "Talaba yugur" marafonida muvaffaqiyatli ishtirok etgan sportchi-talabalar bilan samimiy uchrashuv boʻlib oʻtdi. Eslatib oʻtamiz, Fargʻona viloyatidagi oliy taʼlim muassasalari oʻrtasida oʻtkazilgan mazkur marafonda universitetimizning 7 nafar talabasi faxrli natijalar qayd etgan edi. Uchrashuvda Yoshlar masalalari va maʼnaviy-maʼrifiy ishlar boʻyicha birinchi prorektor hamda Sport klubi raisi oʻrinbosari ishtirok etib, sportchilarga universitet jamoasi nomidan minnatdorchilik bildirdi va ularning muvaffaqiyatlarini alohida eʼtirof etdi. Tadbir doirasida talabalar oʻz taassurotlari bilan oʻrtoqlashdi, kelgusida ham sport va sogʻlom turmush tarzini rivojlantirish borasida yanada faol boʻlishga daʼvat etildi. Uchrashuv do‘stona va iliq muhitda oʻtdi.

Muhammad Yusuf tavalludining 71 yilligi munosabati bilan Filologiya fakulteti talabalari tomonidan Qo‘qon shahridagi "Muruvvat" uyida ma’naviy-ma’rifiy tadbir tashkil etildi. Tadbir davomida shoirning eng sara she’rlari o‘qildi, yuraklarga iliqlik baxsh etuvchi kuy-qo‘shiqlar yangradi. Samimiy suhbatlar, iliq uchrashuvlar orqali ishtirokchilarga Muhammad Yusuf ijodining inson qalbiga ezgulik va mehr bag‘ishlovchi kuchi yana bir bor his ettirildi. Tadbir barcha ishtirokchilarga chuqur taassurot qoldirdi.

Bugun Qoʻqon davlat universiteti Axborot-resurs markazi binosida Pedagogika va Ijtimoiy fanlar fakultetlari ishtirokida 9-may — Xotira va qadrlash kuniga bagʻishlab “Vatan ravnaqi, tinchligi va himoyasi yoʻlidagi qahramonlik unutilmaydi” shiori ostida maʼnaviy-maʼrifiy tadbir tashkil etildi. Tadbir davomida Vatan ozodligi yoʻlida jon fido qilgan ajdodlarimiz xotirasi yodga olindi, ularning mardligi va fidoyiligi yoshlarga ibrat sifatida namoyon etildi. Tadbirda o‘z yigitlik burchlarini Afg‘onistonda bajargan, baynalmilal jangchilar safida xizmat qilgan ustozlar — Rafiqjon Ahmedov (“San’atshunoslik va sport” fakulteti dotsenti, O‘zbekiston kompozitorlari va bastakorlari uyushmasi a’zosi, “Shuhrat” medali, “Fidokorona xizmatlari uchun” ordeni, “Madaniyat va san’at fidokori” ko‘krak nishoni sohibi) hamda G‘ofirjon Yunusov (“San’atshunoslik va sport” fakulteti dotsenti, “Madaniyat va san’at fidokori” ko‘krak nishoni sohibi) ishtirok etib, yoshlar bilan o‘z hayotiy tajribalari va Vatanga sadoqat haqidagi fikr-mulohazalarini bo‘lishdilar.